الوطن

أنا من عشقي لك نحني

جبيني وخافقي والجاه

ياوطني بخير صبّحني

واستودع عليّ الله

وهيا بشمسك وظلك

أصبح فيّ

هيا بنورك وطلك

خذ بيدي

وازرعلي أمل يومك

وداعبني بشذا نسومك

ياوطنى الاغلى

ياوطني

ياوطني اليوم ياني اكبرت

وعرفت أيش قاللّي سيدى

في أول يوم فيه ابحرت

وكانت يدّا في ايدي

وكان يقولّلي الموجه

عليك اتصبح اتربح

ولك تدعي

وهذا السهل وامروجه

وحتى الورد لك فتّح

وهو يدعي

ياوطني اليوم ياني اكبرت

وعرفت ايش قاللي سيدي

في اول يوم فيه ابحرت

وكانت يدّا في ايدي

وكان يقوللي هالوطن

ياخذ من خضاره روح

ولك يعطي

وكان يقوللي هالوطن

يا وليدي صبوح ربوح

مايبطي

علي من حبه ابنيه

علي من ضحّى لجله شوي

حبيبي..وطني يسلملك

من يدعيلك بقلبه

حبيبي..وطني يسلملك

من يصدقلك بحبه

ومن في غرسك ايسقي

ومن في شوكك اينقي

ومن في هامتك يبني

وانا من عشقي لك نحني

أمي

تخيلتا عند الضحى..

تلعب مع جاراتا.

تخيلت النفايل..

وخيوط اللواحيق..

تْزين اقريناتا.

وحسيت بدفا تحنانها..

وهي تبرم احذا التنور..

وتنتظر قنانها.

تخيلتا تاخذ الطيب م الرغيف..

توديه للجيران.

وترد بالزلفة..

وكاس اللبن مليان.

وتخيلت الخطيوات تستاسع..

واحلامها تكبر.

في زوج يسكنها لها ياسع..

وهي صابرة وتصبر.

تفطّر ضناها..

كل طلعة صبح

تدعيلهم بالربح..

وتْوصّي.

علي حوش للجيران..

نين ايجو..

من بعد غيبتم.

تفطّر ضناها..

كل طلعة صبح..

تدعيلهم بالربح..

وتْوصّي.

عدو لعيت فلان..

راهم الحقهم سو..

نين ينسو فجيعتم.

هي صابرة وتصبر..

ماتريد من الدنيا قصور..

لا تحلم تْسمع صوتّا للناس.

لا تعرف احزاب لايهمها دستور..

لا يجيب خافيها لها وسواس.

كل يوم تستاسع..نمت خطوتّا.

نين ريتا عند الضحى..

سفْيت اقناع..البست نظّارتا.

ومدّت خطاويها بْعجل للجارة..

تحكيلها..تسمع حكاويها..

وايش صار في الحارة.

في عقلها..

تقول الوطن حارتّا..

كل الوطن هو الحارة.

مهما الظروف رمتّا..

باحزان..واوجاع..

تْصبي بعزيمتّا.

وتطلق خطاويها .

كل يوم للجارة.

تحكيلها..تسمع حكاويها..

وايش صار في الحارة.

لها قلب كيف الوطن..

ياسع الدنيا كلها..

مايعرف مغير الحن..

حتى لمن عقّه.

إلا لمن خان الوطن..

ماتعرف عليه اتحن..

لا تالف عليه ارضا.

عفوية

إلي روح والدي الذى توفّاه الأجل

يوم 1ـ3ـ2011 م

غفر الله له..وأسكنه فسيح جنّاته.

هك فتّحت ابّساطة..

شفت نوره.

وارتضيت بغير جبر..

انجي لشوره.

كنت عفوى ..في هواه..

وفي ارضاه..

وطول عمره..

كان هو حد التمني.

وكان عفوى..في هواه..

وفي رِضاه..

وفي استلاب الروح مني..

وكان عفوى..

حتى كى غادر خذلني..

وكان عفوى..

بما ترك من ذكريات.

ماسمعت ايش قال خوي..

غير صوتا..هو الصوت.

ولا نظرت لبنت بوي..

غير ضحكة..رغم موته..

ماتموت.

وكم بدتلي مُظلمة..

اركان بيتا..والبيوت..

اتظلم ان فقدت كبير.

وكم فقدت الهمهمة..

لحظة قنوتا..وفي القنوت..

اشفاه تدعيلي بخير..

ماتردد في دعاها..لا تباطا.

بالليبي

بالليبي أنا ليبي..

بكت أمي..

حملت سلاح.

بعفويتي هذى وطيبي..

نزف دمي..

عليها فاح.

وتخلّط طيبها بطيبي.

تقمّطت بغلاها طفل..

وتلحفتا بعد شبّيت.

تنفّست الغلا من قبل..

مانصبّي وبه صبّيت.

زمان أيام صغراني..

سألت ايش معنى نا ليبي.

وليش حتى وانا نعاني..

لها الاشواق تسريبي.

تذكّرني أنا ليبي.

خذت اوقات من عمري..

وخذيت منها انا عمري.

وحدها استوطنت صدري..

ووهبته لها أبد صدري.

لأنها هي مسافاتي..

وهي خطوات تمشيبي.

وهي الماضى وهي الآتى..

وهي اللي فـيّ هي طيبي.

أماني صغيرة

كم صغيرة هي الاماني..

وكم بخل بيها الزمان.

ماطلبنا شي ثاني..

غير حرية وأمان.

جيتنا في فجر حامل..

حلم ياسعنا كبير.

وعشت فينا عمر كامل..

ماالتمسنا فيك خير.

اكتفينا م الكلام..

اللي سرق منا الزمان.

وانتفضنا لا احلام..

غير حرية وأمان.

يومها انجنّيت..وثرت ساعتّا..

بتعالي يومها انجنّيت.

ما اعتذرت ولا طلبت الرحمة حتي..

للاطفال اللي فنيت.

كنت متصور كلامك..

يردنا خايفين..

ونتبرو من ادمانا.؟!

واللا متصور احلامك..

تستلب منا السنين..

وتستلب حتى ضنانا؟!.

شوف كيف خاناتك الحكمة..

واعتقدت ان الأمان.

في البطش من غير رحمة..

والتجرد م الانسان.

ياترى هل كنت لحظة..

بينا انسان.

واللا بس كانت غشاوة..

ووقشعها هالزمان.

صدقني افتقدتك

صدّقني افتقدّتـَك ..

في كل الظروف ..

ف الفرح دونَك تختفي بسماتي ..

وفي الحزن مَن كيفَك عطوف .

مَن كيفَك قريب لنفسي ..

يا نفسي ..

وسرِّي الدّفين .

في جهري حروفي عاشقة ..

وفي همسي ..

نهمس حنين :

يا عشق ساكن في غياهب روحي ..

يا ودّ ودِّي .. يا اخطا نمشيبها .

يا نور جلَّى كلّ ياسي وموحي ..

يا نفس غمرتني بدفاها وطِيبها .

عاتب عليك اتفارق ..

ترحل ..

ونا مـحتاج تقرَب منِّي .

عاتب عليك اتفارق ..

ترحل ..

ونا الِّلي رفقتـَك متمنِّي .

عشقت الرحيل ؟ .. تغرّب ..

قدَّامَك دروب .. وطوف .

لا ودّ صافي تلقى ..

ولا قلب كيفي ..

ع الّرفق ملهوف .

صدّقني افتقدّك ..

في كلّ الظروف .

حنين

صباح الزعتر

الزعتر..على فكرة

فيه من روحك كثير

شهي.. ومدهش..

وبلدي..

لذيذ وينعش التفكير.

وكل ما في الزعتر

البلدي فيك

وفيك أكثر

جيت هاللحظة بحنيني

نشم الصبح في شعرك

ونلمس.. كفك الأسمر

جيت سمراي انتغزل

بابتسامة لاطفت ثغرك

جيت نُظهر

كم.. يشوّقّني صفاك ؟

وسحرك العفوى

وتمتلابك لو ابتسمتي

عين عيني

وكان ياسمرا اسهيت

وانتى جنبي..اعذريني

تكون لحظات التجلي

اكتبي هاللي نقولا

اكتبي بعضي...وكلي

واكتبيني.

اكتبي لحظة ميلادي

ذات يوم

في روابي هالمكان

بين اشجار البطوم

واكتبي سيرة حياتي

يوم كنت انعيش

ع الزعتر.. وندّاوابا

اكتبي كانت وطاتي

اتمدني بلقمة العيش

وتمضّني بافواه غابا

واكتبي فيها هواي

اقترن بالياسمين

واكتبي زلّت اخطاي

وغرّبتني سنين

كيف نحلة

غازلت احلى الزهور

والثمت كل الثغور

واخر التجوال عادت

تشتهي زهرات زعتر

اكتبيني اليوم جيت

انحن ياسمراي أكثر

للروابي والغدير

اللي تسامى عالتخثّر

ولبنّة الزعتر

الزعتر

اللي على فكرة

فيه من روحك كثير.

طيب

ولو كان الغضب جامح..

وكانت جفوتا مرّة.

حبيبي يحن ويسامح..

طيب هك بالفطرة.

لا يعرف يدارى الشوق..

ولا الاسرار من شانه.

عفيف وصادق ومطلوق..

ومكنونه علي لسانه.

بسيط ويشبه الاطفال

واكبر همهومه اشيائه..

ثيابه وهاتفه الجوال

واصحابه والف بائه

وكتاباته علي ماصار

في يومه

خرابيشه وبقايا احبار

والبومه

يزعل بس هي لحظة

ويبعثرها بضحكاته..

وبنجواه

وفي مكانه يلف

هالكون الوسيع

يدلل بعشقه ودموعه..

وبهواه

ومن حنانه

يحل قلبه للجميع

طويّب علي نيتا ..

الطيب هو سرّه

اللي بيه حبيتا..

وفيه همت بالمرة.