الليلة

الليلة كل شي يكذب

نخاف نصدقك عيني

الليلة شمس ماتغرب

وقمر جنبي يناجيني

همس بالشعر غناني

لمس بالشوق الحاني

وخذا يدي وعدينا

نلف الكون

ومن علياه حقينا

كأن كل شي مجنون

سحايب لونها وردي

وتشبهنا لها جنحان

وفيها عيون

وتهمس كيفنا وتلعب

وتضحك ضحك

يملا الكون

ومن علياه حقينا

ربيع وتمتلابا العين

ومن علياه شمينا

عبير الورد والياسمين

ولفينا خذانا السهر

لفينا لقينا البحر

الليلة رايق وهادي

وفيه من طبعك حبيبي

يسرب الدفء لفؤادي

في يبدا وينتهيبي

منين ما أنت في بديت

يوم ذريت المواجع

واستبقت الحلم في

يوم ما خوفي تراجع

والأمل ظلل علي

ياأرق انسان واعذب

السمرة

كان مارس وكان البرد

يلفح وجوه المارين

في الباحة جنان الورد

وفي البيت ملتمين

والسمرة اتهادا بينهم

والكل فرحانين

يالله زين جيدها

طوق الياسمين..

وهي تمطر الكل بتمرها

والنور ما يفارقها

الشيح العفي في غمرها

ومروّي مفارقها

فيها البشاشة والمحنة

والحيا

فيهامباهاة     العزيز

والكبريا

ولمة الخوت .. الخوت

 تحفها بالنور

ويزين مفاتنها السكوت

وكان   من بين الحضور

ضيف  جابنه اقدار

يعتلي وجه السرور

ويكتسي شكله الوقار

جد طيب..يبان طيب

يدخل القلب بسهولة ....

حليت السمرة في عينا

مد يدا

و وخذا منها ياسمينا

و وتغزل..بيها

كم تغزل

كان يعرف كم هي السمرة

رقيقة

وكم بسيطة..وهو خبير

وله طريقة

في امتلاك اللي في باله

ما تأخر..مد يدا

لجيدها..

لطوق الزهور

وللتمر في كف الغزالة

ضمهن في غمرة

وامتلكهن..

وامتلك حتى السمرة

و وهمس

في اذن  واحد

م الحضور

امنيات..كان ظاهرها

السرور

وهي مليئة بالتمائم

والشرور

وانشحن جو المكان

والخوت من همساته

ماعاد تمّو خوت

والسمرة الرقيقة

اذبلت

وفقدت محاسنها

من فقدة الخوت

وتمت  هزيلة تذوي

وتقترب م الموت

وتشتهي شى يوم

لمّة..كيف زمان

تشتهي ترجع صبية

 تحضن الياسمين

http://www.youtube.com/watch?v=u5TpiPUel4Q

كل هالدنيا حبيبي

كل هالدنيا

كل هالدنيا حبيبي كوم..

وانت كوم.

نقدر نخاصم الدنيا..

لكن انت..لا حبيبي..

حتى يوم.

شوف كيف اطراف كفي..

ترتعش لحظة مرورك.

حس بس بروح روحي..

تذوب في لحظة حضورك.

حل عينك..

حل قلبك..وانت تعرف

أى وصف..

لحال عشقي..غير منصف.

خاب ظنك..

لو تظن اني هويتك..

ناعشقتك  للثمالة..

نا شربتك وارتويتك

لو على كفي يتمنى..

مايغادرلحظة كفك.

ولوعلى قلبي ايتمنى..

في دفا حضنه يلفك.

ولو على روحي..ياروحي..

ساكنتني واتّنفس من هواك.

ولو على عيني..ياعيني..

ماسكن فيها سواك.

كى تغادرني..يغادر..

من حياتي كل شي..

وكان جيت..اللي مغادر.

لحظة احضررك يجي..

كل هذا وانت خايف.

م الخصام.

تظن نقدر ع الخصام..

لا وحياتك ولا اتخيل..

حتى يوم.

كل هالدنيا حبيبي كوم..

وانت كوم.

http://www.youtube.com/watch?v=YjVQY19M1-s

تأمل

تأمل صفاحى ما انطوى..

من صوبنا..

وانشد علي دليلك.

عاود اذكّر مامضى..

تعرف اني..

من صادقة نشكيلك.

يوم قتلك تمهل..

ما تاخذ علي اخبار..

وتصدّق منين ماجاتك.

يوم قتلك تكتم..

را الحاسدين اكثار..

وانت علي نيّاتك.

كيف فرحتك نا فرحت..

لكن كتمت السر..

عمر الغلا بكتمانه.

وانت فرحت وبحت..

للى احذاك السر..

وياريت سرك صانه.

اذكّر تلاقينا..

تلاقينا ايام واحنا..

بالغلا فارحين.

رفاقا تمشينا..

وهمستلك اللي بينا..

خلّا دفين.

وخذانا الغلا رحلة وعدينا..

وكررتا مرات خوف البين.

كررتا مرات..

ووين ما نويت لخطوتك مرواح..

لحظة انسلّت م الفراق ايدينا.

كررتا  وضحكنا..

وقلتلي هي للصباح؟

في وقتّا نا عارف..

شرهتك بيه الغلا..

كى شرهتي تحكي.

في وقتّا نا عارف..

كى تحن وما اتطول اللقا..

لقرب ابنادم تشكي.

وما نامن ان كان شكيت..

لبنادم حكى.

وصارت صحيح حكيت..

وصارت حكى.

الشمس...

في بساطتّا ..البساطة

شاعرية..

مترفة م الطيب حد انها

حميمية..

حميمية..بحميمية..

روحا تشبه الشمس..

بالدفا تملا الكون.

صوتا يغري الهمس..

م العذوبة فيه لون.

فيها فوضى في خُطاها..

مع ابتسامة..

كيف وردة تزدهر.

فيها اصرار الأنوثة..

واتسامى..

كيف زخات المطر.

امتزج بيها ورواها..

الها وحدها هالعطر.

وفيها شي مبهم كساها..

ما كسا عمره بشر.

كل شي فيها يغازل..

كل شي عنها ايتحرى.

وهي كأن الكون غافل..

ترمق العفة بنظرة.

واتمايل في خُطاها..

مع الأثير.

العذبة كما قطر الندى..

الصافية..كيف الغدير.

تحتاجني ونحتاجها..

أكثر ..كثير.

تحتاج تسكن فِــــي..

ونحتاجها فَــــــي وهجير.

نحتاجها لمسة الحن..

اللي تحن عليّ

وتردني أصغر صغير.