عجز الربان

لحظة غروب

وصمت ماهو من ذهب

ملّ الخطوب

واختلا بروحه الأب

كان مجهد

وكان مثقل بالهموم

رد يذكر

حياته يوم يوم

امتا قصر ياترى

امتا قصر

اقترب اكبراولاده

يحاول ايخفف عليه

كان يشحذ همته  

يبي مدخل للحديث

وقبل يلقى

قبل يبدا في الحديث

ابتدا الأب الجريح

يسرد الخيبات تترى

خوك الاصغر

ضاع منا

في زقاقات المدينة

وماعرفناله مكان

ولازمان

خوك وينا؟

واختك اختارت

عريس

ودون شوري

هاجرت

عرفت المينا

وامك..

امك المسكينة

قاومت جوع السنين

واهزمت داها اللعين

واعجزت

تكتم وحدها

 لوعة الفقد الحزينة

طلعتا وغادرت

غاردت

ما شالت معاي الحزن

هالمرة

من يقسم معاي الحزن

ياحره..آه

آه..انتهت آها

وبدت آها..

واللهي..و الله ياطيب

مافي اطيب منك

ياعفويتك في كل شي

ياحنّك والله ياحنك

كملت اسنينك تحسبها

تعرف ربك

تعرف انك..

ماشيله في آخر دربك

ياعجزي ع الكلام

والله لوتدري

كم عاجز هالكلام

وشايلك صدري

 يابوي ماقصرت

حاشاك م التقصير

يابوي المدينة

اكبرت

 وامتثلت بغول كبير.

نص مارس

نص مارس

الفصل يبدو الربيع

ومش ربيع

كان جالس

ظل ساس

يستريح

فيدا ابرة

وفيدا خيط

وشك لمفاتيح

وعمر كامل م التجارب

جاه جاره

يستشير

ايش ظنك في العام

عام صابة..عام خير..؟

في السما شيّع عيونه

وبعد صمت

اطلب الرحمة وتضرّع

في السما مواير جفاف

  

ووصِّي لرحام اتّواصل

بالمحنّّة والنظاف

ومد يدّا

واحتضن ثوبة الثمين

احضنه كيف وطن حاني

احضنه لقلبه وشمّه

 زاد شمّه

ورد في عمره سنين

ليوم مشمس فيه شافه

كان زاهي

كان رايق

وكان يملا كل عين

غيّر الجلسة

وتنحنح

ووبدا يخيّط الثوب

كل ما يخيّط اشريط

يكتشف في الثوب غيرة

وكلما يقطع الخيّط

ينتكت نكتة كبيرة

طاحت الشمس وتوصّل

غير زايد

ثوب بايد

ما نفع فيه الترقيع

نص مارس

والفصل يبدو الربيع

ومش ربيع

تمشي بخفّا

تمشي بخفّا ..

ياالله تكونلها عون.

تستلطفا..

وتنابش فيها العيون.

الشفافة كيف روح النور..

الممزوجة بكليل وزعتر.

الفوّاحة كيف عطر الارض..

لحظة أول غيما تمطر.

رقتّا عالرقة تثور..

تستهويني..لا والله أكثر.

تذوبني في العشق..

وتسمو..مااتأثر.

تمشي بخفّا وتْناغيني..

بعيون سواهي ناعسات..

هدبهن مطلوق علي حل.

تمشي بخفّا وتناغيني..

وفي مْناغاها لحكايات..

خوافي يخلني نسأل.

هي تقصدها..

هي تعنيها..

واللا صدفة طاش نظرها..

ومنها نا هو اللي انتوهّم.

ظنيت وصدّقت خبرها..

وقبل جوابي فيه انخمم.

عدت جنبي..ومرت..

يااااااملطفّا

الظلام

كنت فيما كنت طفل

عمرة تسعة..أو عشرة

عوام

كنت نلعب

كنت نعبث

وما نخاف إلا الظلام

كنت نا وبعض الرفاقا

نرمو في الاحجار

في نص الطريق

او نسدّو في ممرات المشاة

قمة المتعة تصور

هو ممر ونخلقو م الزحمة ضيق

كنت نكتب

كنت نرسم ع الجدار

وما يهم أين جدار

في الشطانة كنت بارع

وكنت نزعل لو انكسر

مصباح واحد من

انارات الشوارع

بس لأنه هو الوحيد

اللي تغلب ع الظلام

مافهمت الخوف نابع

من أحاسيس ومشاعر

ولاعرفت أن الاوادم

عالم آخر

فيه أسود م الظلام

ولا عرفت ان الخديعة

تستتر خلف ابتسام

وان الوجوه الوديعة

تفجع اكثر م الظلام

عمره ما كان الوطن

لاهله سبي

كل شي فيه بثمن

كل شي

أنا اول من هتف للوطن

انا اول من حكى

انا اول من حماه الوطن

انا اول شخص للجبهة مشى

وأنا اول من اماط الاذى

عن جنب الطريق

وانا اول من دعا

للوطن في الضيق

وأنا قدمت له واجد

وانا لجله كنت ساجد

وانا اجّلت افراحي

لأن الوطن مش آمن

وانا مانسلم اسلاحي

لأنه للوطن ضامن

حرام يصيرله هكي

وطن من دمنا مخضب

فرح بينا وبدا يبكي

زعل منا وبدا يغضب

حرام يصيرله هكي

حرام

الوطن يعني المحبة

والسلام

الوطن يعني ابساطة

روح وانفاس وهوا

ونبض يعلن ارتباطا

بيه ولآخر مدى

ياشباب هذا الوطن

يارجاله والنساء

انتهت كل المحن

وآن نبدا في البناء

ونعرف انه هو وطنا

والوطن ماهو سبي

لصوص

يالصوص آخر زمن

تلبسوا اثواب الحرير

وتسرقوا وضح النهار

تدّعوا حب الوطن

وتسلبوه بفواتير

وتدعوا انكم ثوار

مااسعده هذا الوطن

المقاتل مرتزق

والسياسي هو وبس

والمواطن مختنق

صاربس يبي نفس

لو تعاودبه الثواني

قبل مايفارق شهيد

يمكن يغير الاماني

من جديد

ويقبل التطهير الاول

دار..دار.

يالصوص آخرزمن

تسرقوا لكن بفن

شي عهده وشي منحة

وشي افراح التحرير

وتبرروا اللي ايصير

انه بعض حقوقكم

في هالوطن

مااسعده هذا الوطن

كل فاشل مدّعي

اصبح لسان

يحكي باسم المجتمع

ويذم هذا المجتمع

ولا يحاول يستمع

لاصوات غيره في الوطن

وين

حبيبي وين؟

حبيبي وين؟

سألت وما سألت

إلا على محبوب

كل الكون

وكأن الكون

كل الكون كيفي

حس بغيابك

مجرد مارفعت الصوت

حبيبي وين؟

انتهت لحظة سكون

وردد كل أحبابك

وين؟

حبيبي وين ؟ بدت نسمة

أنا ياناس من يومين

ما حمّلني ابعطره

ولا كحلني بالياسمين

وصاحت وردة ذبلانه

وين؟

حبيبي وين ؟

من كم يوم ما قابل؟

ولا ذوّب بنظراته

ندى زهري

ونجم الليل هالمسكين

ساهم من غيابك ماعرف

يطلع منين

وانا والله ..مش عارف؟

لاصبحى بدا كيف امس

لا ظلّي ظهر وارف

ولا دفّت نهاري الشمس

لأنا ماسهرنا الليل

كالعادة

وفتحنا للغلا بيبان

تصدّق انه حتى الليل

بلا راده

غادر منكسر زعلان

لأنه ماسمع صوتك

توشوش فيّ طول الليل

ولأنه ظن في سكوتك

نهاية حلم حبّا الليل.

دهداه

شربناه ورويناه..

م العشق وشربناه.

وهويبشبش علينا..

بطيبته..الله..

شرهاب م الفرح ايتراقص..

في ملاقا وديدينه.

بعرعار..وزعتر ايهامس..

وبطّومه ورياحينه.

من عنده وطن كيفه..

ربّانا بخراريفه..

عالعز واكبرناه.

فيه نسكنو..وفينا سكن..

بشر وداد وحن..

وفال خير في صبحه.

فيه نسكنو..وفينا سكن..

ونحنا عليه احنن..

نحنا بشير..يبشر بفرحه.

مقيوم الغلا بيناتنا..

نحنا روحنا في ارضاه.

وهو يحلف الا بحياتنا..

دهداه..هو دهداه.

بانسام ايترجب ماطره..

وبظله وشواطيه.

ونحنا نعدّو خاطره..

وله صادقين النيه.

نبوه ديما بخير

به فارحين

ونحمدوه الله.

حنين وطفولة

مايغرك يابنتي كبري

لا الشيب اللي مالي راسي

حتى لوسافرت بعمري

الطفل اللي ساكن احساسي

يخليني نامن في عيونك

ونحتاج لعطفك نا أكثر

وانحن اللعبك وجنونك

واحكاياتك في اتأثر

خوذي يدي

ودبخيلى

وخليني نضحك من قلبي

والدنيا تسمع ضحكاتي

بصبعي عدي

واضحكيلي

هذا ثوبك

وهذي النظارة والسبحة

وهذا الكاط وهذي فرملتك ياباتي

واحكيلي نا كيفك راني

الحكايات تهدي في

مش شرط تقوليها صاح

قولي شمطة

نفهمها شنطة القراية

قولي اوفا

نفهمها تعني محاية

قولي مرة في ابنية

في ايديها علم استقلام

نفهمها كانت البنية

في ايديها علم استقلال

الحكايات اتأثر فيّا

وننسى معاهن هم اليوم

نفرح بيك وبعد اشوي

علي حجرك ياخذني النوم

شفتي كيف

علي هالحجر يطيب انعاسي

ونحتاج اكثر لحظة حنك

شفتي كيف

الطفل اللي ساكن احساسي

اصغير كيف

ويمكن حتى اصغر منك.

طفولة

يامداين من طفولة..

من نضارة..من صفاء.

ياأزاهيري الخجولة..

ومنتهى معنى النقاء.

عام قادم وبحلوله..

جيتك انعيد أنا.

نمسح الوجنة المبلولة..

من خجلها والحياء.

ونطبع القبلة الاولى..

في العام اللي بدا.

المولود

بعد العجاف..

اللي تعدّن لربعين.

عاش صحوة هـ الوطن..

سبحان ربي..

وابتدا مولود ينشا..

من شعار.. وصدر عاري..

وبعض طين.

ينتشر يملا الهوا..

يزهّي الخواطر كلها..

يملا بمحبّة كل عين.

اليوم عديت انتمشى..

دون ما نرسم هدف.

القيت الخطاوى تقود..

في بخفّة.

لمفوز الطلحي..حي الخرشتان.

وحسّيت أن الحي يبدو مختلف..

أو اني غبت عنّه من زمان..

بالرغم اني كل يوم انجيه.

هو في طريقي..

ولازم انخطّم عليه.

بس اليوم متغير..او انها..

نظرتي للحي توّا تختلف.

في مفوز الطلحي..

حسيتبا صبحي..

يرد صبحي اللي زمان.

وحسيت طيبة في الوجوه..

وشميت ..مااحلاه المكان.

قبّلت الرصيف المنعطف..

ووقّفت لحظة..

انتهجّا ..في العبارات..

اللي زيّنت كل المباني.

حسّيت كأن الكتابة..

تصدر الاصوات.

وكأن المباني تجاوبها..

كأن المباني.؟

سكان الحي خطّاطين..

جميلة الخطوط..بليغة المعاني..

تدل عالثورة.

برغم القاف الغير منقوطة..

ورغم الراء اللي كأنها..

ألف مقصورة.

بس اسمعتّا..عرفت نقراها..

(معمر حقيرـ طير ياحقير)

سكان الحي خطّاطين..

جمال الخط في قلوبهم..

في احساس ايديهم..

بقيمة كل ذرّة طين.

وايش يمكن يصير الحجر..

لمّا تمسكه كفين.

تخط ع الجدران أردى خط..

وترميه في وجه النظام.

سكان الحي رسّامين..

جميلة الرسوم..

بالرغم من عدم التناسب..

في أجزاءْها اللوحة..

بس واضحة اللوحة..

(صورة زعيم ..يشبه زعيم)

سكان الحي رسّامين..

جمال الرسم في ايديهم..

في احساسم بالحجر والتلوين.

في كون في الصورة تجلّا..

حجم هالحقد اللعين..

اللي ملا وجه الزعيم.

وفي تحدى ريشة الثوار..

لزلام النظام.

وقّّفت لحظة..

قبّلت الرصيف المنعطف..

وارخيت الخطاوى بخف.

على يساري فاطمة الزهرا..

وعلى يمينى حوش حامد.

كان نقطة م العذاب..

اللي ابتلى هالشعب بيه.

اجتهد في الصغر واجد..

وبامتياز..

تخرج من كلية الآداب.

وانتهى في هالشوارع..

أي واحد يعرفه ..

ايتحسف عليه.

ارخيت الخطاوى بخف..

جت عيني عليه..

البيت بودورين.

المطلي بس بسمنت..

دون دهان.

اذكرت..

جيتا البيت بودورين..

من كم عام..

هذا بيت سي عثمان.

جيتا..

يومها انعزي..

علي ضحيّة..

من ضحايا هالنظام.

ويومها مكتوب ع الشادر..

(لاتقبل تعازي الامن الداخلي)

لا نرقدو ع الدين.

الله يرحم الناجي..

من يومها في البال..

ساكنة الصورة.

وقبل ايام..

من هالبيت الاسطورة..

كانت أم للثورة..

نجيّة بنت سي عثمان.

في أول يوم..للثورة..

تزغرد..

ترمي في الحجر..

وتهتف..

حان رد الدين..

حان رد الدين.