الاثنين، 27 ديسمبر 2010

المحطّة



هاك اشرب

هالمضاد لأى حاجة

وخذ طريقك للمحطة

في المحطة

عين تهمي

تنتظر..وماتطول حاجة

وفي المحطة

قلب يهذي

يظن..مامل المراجا

في المحطة

يصعب الكسب الحلال

وتجبرك ترضى الظروف

في المحطة

يلمس الشفة السؤال

وتمنعك رعشة الخوف

وفي المحطة

الوجوه تبان ذكرى

لا ملامح

وفي المحطة

ما في بكره

شي واضح

في المحطة

تبدا يومك في ترقب

وتنتهي في لا أمان

وفي المحطة

البشر ضد التمذهب

والكره يملا المكان

في المحطة

قمة الفوضى النظام

وكل شي يبدو غريب

في المحطة

تنسرق منك اعوام

وتعجز اتعل السريب

في المحطة

كل وقت مهدور ابساطة

وفي المحطة

ينطق الزور بطلاقة

وفيها تعرف أغرب

معنى للعبوس المقترن

بالامتنان

وفي المحطة

تستوى اعقاب السجائر

والانسان

في المحطة

تكتشف ان المحطة

تملك آلاف الوجوه

وجه عابس للغريب

ووجه باهت للفقير

ووجه ناعم للغني

ووجه انعم للامير

ووجه ..ياكثر الوجوه

جد معتم

تلتقي بيه المعتوه

ولو خذيت

م المضاد لأى حاجة

وادّعيت انك فهمت

هذا يعني انت

في عنق الزجاجة

أو بمعنى

تدّعي وما فهمت حاجة.

السبت، 11 ديسمبر 2010

مسألة


اقترب مرة الحزين

م الأسى..واسأله

ديما هكي مااتّغير..؟

جاوبه..

لويطوّل فيك حزنك

تعشقه

أو بمعنى

يكون عندك شي

يحتاجه الجميع..وقت ما

أي تصور

أن هاذى الشمس

ذات مرة ما اعشقت

هذا الشروق واختفت

واللا ذاك الليل مرة

مل نفسه وما استسلم

للسكون

أو السحاب اللي تشوفه

عام كامل في السما

يمتنع يسقي الوطا

ايش يكون الكون ؟

كيف نفسك ياالحزين

يوم تحتاج لفرح

ويوم حزن

رغم انك تكرهه

ويوم تحتاج لغياب

أو تأمل أو رضا

يالحزين

هك بس المسألة.

الجمعة، 3 ديسمبر 2010

بيّاع الأحلام



في يوم م الأيام

كان ماطر

وقّفت فجأة امطاره

واطلعت شمس الشتا

تحضن نهاره

بيّاع ...ع الشط

يبيع في الاحلام

يشيل فلخطا ويحط

احلام ...احلام

جاتا عجوز كبيرة

بيّاع....يا .. بيّاع

نبّي سنين زمان

اللي غادرت ما ردّت

ونبّي دوا النسيان

لمواجع قديمة وجدّت

وسعلها..جنبه مكان

غمّضي عيونك دقيقة

تخيّلي..

شط..ورمال..وابراج

اسمعي صوت الامواج

شوفي هالطفلة الصّغيرة

ألمسي قريناتّا

شوفي أثر خطواتا

أسمعيها وهى تغنّي

يا مطر ياعمتي

شوفي سمار الحنّة

في كفّها الحنّي

تعالي هنا يابنيتي

أحلام ...أحلام

بيّاع...يا .. بيّاع

نبي حلوة قطن

ونبي مصاصتين

ونبى العاب ودمى

بس وين نلعب بيهن..؟

لا ...يابيّاع

نبي بس... وطن

فيه احلام بلاش

وفيه قسوة..وحنّ

فيه اغطا وفراش

وفيه بنّة وطن

غادر البيّاع

وفي عيونه كلام

أحلام....أحلام..