الجمعة، 20 مارس 2015

خوف



انت متوتر شوي

واللا نا هكي نشوفك

ياترى تخبي علَيْ

واللا مستسلم لخوفك

خلف صمتك انتباه

وخوف خلفه

خلف رعشاتك شفاه

تضم لهفه

ياغلا حسيت بيك

بين يوم..وبين ليلة

رغم اني نشوف فيك

كل هالمدة الطويلة

مااتردد

بي خوف ومنك أكثر

في واضح

ضمني وهيا انتجرد

م المخاوف ونْتصارح

بعض لحظات الحياه

يااخسارة لو انتأخر

مااتكرر

اطلق القلب ايتخلّى

عن اسراره..ويْتحرر

واتحرر..

تنسى خوفك.






استذكار


ذكريني ياشوارع

بأي حاجة م الطفولة

بي حنين قلبي يصارع

شوقه للخطوات الاولى

يوم عيني

كانت الصورة اللي فيها

بس ظلالك ياشوارع

يوم ذاكرتي تعبّت

من شجونك

وانتى لي كل المضارع

وكل علمي من فصولك

وقلبي لك كله وطن

بالحن ضارع

من دفاه الجار ظني

كان ظني فيه بوي

وبوي روحه في زارع

ومن محنّتا الجارة

كان ظني فيها أمي

لي تسبقها المدامع

وكان حوشي فيك يبدا

من بداية حاجر الجيران

لآخر الشارع الثاني

وكان يومي

يبدا من دعوة الاذان

وينتهي باجمل الاماني

ذكريني ياشوارع

ذكريني

يوم كنت اخطاي بادي

ذكريني

بالسليقة..بالعزايم والزرادي

ذكريني بالطفولة ..بالحمام وبالبراج

وذكريني بالوداع

يوم صارعت الامواج

وشلت أحلامي الرضيعة

وفوق كتفي

زاد للسفر الطويل

وروحي تتلا

في وساوسّا الخديعة

زينتلي

العمر يبدا م الرحيل

واكتشفت اني تركت

العمر فيك

وهمت نبحث

في ابعد مكان

وكي رجعت ا لقيتك انتي

في غيابي كم كبرتي

وكم صنعتي ذكريات

وصارت الذكرى القديمة

باقي أثر

في الزمان وانتي اتصارع.




عناد

تريد الونس رافقتك

طول الطريق الموحشة بالصبر

بشق النفس طاوعتك

واذهبت المرافي في نهاية الامر

ولا جيت من هاذين

لا هاذين 

لا منهم مليت العين

لابيت لي تلين

ياقلب من وانتَ صغير

مازال عودك خضر

لا طعتني لا جاك خير

يلهمني الله الصبر

مسكون كلك بالغلا

مابيت تعرف غيرهم

تدير عزم ويردن اقوا

رياح الغلا تمشيلهم

تميت في نفس المكان

لا زاد دابك لا نقص

رهين صوبهم لك وان

تلمست نحسابك تحس

خفاق بين ذكرى وذكرى

تقول نبضتك مطروفة

تشتاق وتشتاق اخرى

مابا حنينك يوفا

فيك الخواطر صايمه

عالصوب  الا لهم

حتى الغيوم الغايمه

تظنها تمطر بهم