لحظة صمت

نشتهي لحظات صمتِك ..
ونشتهي أكثر حديثِك ..
ولـمّا ايتردَّد لسانِك ..
بكلمة اذهبتيها انغيثِك .
وتعاوديها بحنّ وتهمسي :
تسلم حبيبي .
تعاوديها وفي متاهات الخيال ..
تغيبي .
تغيبي مع مناجاتي ..
لِك يا ربيع حياتي ..
ونقولِّك ..
من روح روحي نقول :
انتي الونَس للعين ..
بقربِك وديد زمانها ..
وانتي ملاذ امين ..
وين تكثر عليها احزانها .
انتي الرّوضة الساحرة ..
والخِلّ .
وانتي الواحة العامرة ..
بالظلّ .
ارهيّف كما الاحساس ..
وصادق حديث عيونِك .
ودافي دفا الانفاس ..
طيّب نقي مكنونِك .
ويمتدّ طول العمر ..
يا عمري اللقا لو بودّنا .
ولو امتدّ طول العمر ..
يا عمري اللقا ما يسدّنا .
انتي عشقتي عشق ما له حدّ ..
ونا همت .
في عيونِك وفيهن نشتهي ..
لحظة الصمت .