تعال

هَىْ تعال..

لف هالشوق اللي فيك..

وهَىْ تعال.

ناخذو م الليل قمرا..

ومن غناوينا الخيال.

وم الطبيعة شوى صحرا..

ونفرشو ع الارض شال.

ونجلسو جلسة زمان..

هات يدك.

هو هذاك العطر الاول..

ماتغير..

لا تغير فيك شي.

هِي النضارة..

هو الشغب مازال.

هو التململ..

هو عبث الاطفال.

تشْيطن كما تبي..

تملاكفوفك رمل..

وتكوّمها على يدي.

وتحبني..

وتزعل م الهوا الطاير..

وتسبني..!

هو نا..هو الهوا الطاير..؟

آ ...نعرفه..هذا الدلال..

نفس الدلال.

ماتغير فيك شي..

هو الدلال.

ولو تعجّل هالمسا..

وغادر..كما العادة.

نصنعو م الحلم ظل..

وم الرمل احلى وساده.

وناخذو م الشمس عين..

ونرفعو ايدينا هناك.

ايش تقول هاذيك..

السحابه ..للسحابه..؟

نجاوبك..اسمعتّا

هى تقول :

انكملو باقي

العمر هايمين..

في كبد السما

هايمين.

وتجاوب بسرعه...لا

هى تقول :

ندوّرو ع الارض..

عاشقين.

جمّعو ..ظل ..وسراب

وليل.

ونسقولهم الاحلام..

نخلوهم يعيشو ايام.

بين صحرا..وليل..وظل

وشمس..وسراب..

واسراب السحاب..

واعذب خيال.

تعال..

هى تعال.

الوطن أمانة

إي بالله , الدَّار بلاك ..
انها ما تسوى .
والليل بتذكارَك مُوحش ..
قاسي قسوة .
احذاي السّبحة و امصلاّتَكْ ..
واقريّب منِّي اموضَّاكْ ..
ايذكّر في بسهراياتَكْ ..
ويخطر ترجِيبَك هاذاك ..
عليّ ونا اصغيّر يا سيدي ..
وين انطيح وتاخذ بيدي :
حِمّدَيْن احبيّب عيني ..
حِمّدَيْن ربيع سنيني ..
صبِّي صَبِّي . يا الودود ..
عطيني يدَّك جاك الجُّود .
وفيّ اتدودِش ..
خطوة ..خطوة .
نكبر نا والخطوة تكبر .
ومع الايام ..
اخطاي تزيد ..
وخطواتَك يا سيدي تقصَر .
ويوم بيوم ايقلّ اجهيدَك ..
ووين اتخطِّي ناخذ بيدَك .
ومن قسوة الاوجاع عليك ..
مع عكَّازك .. نسند فيك .
هيَّا سيدِي شمّ انسام ..
الوطن ربيع ..
اتزهِّي دروبه .
هـيَّا سيدي لنَّا ايَّام ..
على مقعَد ..
ظلّ الخرُّوبَة .
خطوة خطوة ..
على قَيس مهلنا ندَّابَو ..
وانتَ تحكي ..
علِّلي من حِبَّانَك غابَو :
عمرَك قدَّامَك يا اولَيدي ..
تكبر .. والذّكرى ما تموت .
تقول : زمان حكالي سيدي ..
ع المحتلّ .. وع الطَّاغوت .
وكان معاي حديثَه ايطُولْ ..
زمان حكالي .. وكان يقول :
الوطن الِّلي قدَّامَك زاهي ..
بربوعه , وفايح نوَّاره ..
وبين اظلاله ايروق الشاهي ..
ويا مَسْمَحَّا بنّة ناره .
ومهيّف ديما في الصّيف ..
وفيه ذرا م المزن العاير .
كَم من فارس حرّ عفيف ..
على شانَه ما هاب خساير .
وكَم من قاصر بات بجوعه ..
وكَم شافَن م الظلم انجوعه ..
كلّ اشبر منَّه مليان ..
بدمّ عربنا ..
شاهد علِّلي صار زمان ..
لمَن حارَبنا .َ
لكن جرّب بصر ايدينا ..
وأيَّس منَّا عدَّا جالي .
وحقّ الله , وحقّ نبينا ..
وحقّ تراب الوطن الغالي ..
ما هادنَّا ..
لا صالحنا ..
لا هان اشبر يوم علينا .
فديناه بكلّ جوارحنا ..
شَطّ .. وصحرا ..
وكلّ مدينة .
عشَّاقه باسمه سبّحنا ..
فوق ارضَه لله صلَّينا :
يحفظ هـ الوطْن ويسقيه ..
من خيره ويبارِك فيه .
واختام كلامي يا اوليدي ..
يقولوا الِّلي خلَّف ما مات ..
اختام كلامي يا اسويدي ..
أحفَظ عنِّي هـ الكلمات ..
الوطْن أمانة ..
بها وصَّاني ..
بُوي .. وجدِّي .
الوطْن أمانة ..
الوطْن وصاتي ..
وخُوذ بيدِّي .

العيد

كل عام وأنتم بخير..

طيّب..اقريب في زها
على الله ديما كل عيد
ودعتبك عيداً مضى
وقابلتبك عيدي الجديد
كثر ماجتني التهاني
م القريب وم البعيد
قبل يوصلني جوابك
ماشعرت بطعم عيد
توّا حصحص
توّا أعلن عن حضوره
توّاحصحص
وابتدا ينشر سروره
في دروبي..وفي سماي
وفي ضلوعي وفي حشاي
في شراييني ونبضي
وفي فؤادي والوريد.

شوق

كل هالدنيا الكبيرة
بالمداين والفيافي
تضيقبي لحظة الشوق
ونشتهى فيها حصيرة
وحضن دافي
وليل ناسيه الشروق
ومن الها غيرك
حبيبي امنياتي..؟
انت فيها كل شى
وفي حياتي
لحظة الدنيا خذتني
ما اشتهيت الا احضانك
ولحظة جروحي غزتني
مافقدت الا حنانك
وانت تعرف
كم هى احلامى صغيرة..؟
حضن دافي ..
وليل منسى..هاحبيبي
وبس حصيرة.
اذا حسيت بي مرة
حبيبي صدق احساسك
واذا حنيت لي مرة
تروى والمس انفاسك
حرارتا حرارة روحي
العطشى ..وانفاسي
ودفاها الساحر المنعش
دفا نبضي ..واحساسي
حبيبي بكل احلامي
وجنوني والصبا..
والطيش
مابين قلبك وشريانك
وانفاسك ..
حبيبي نعيش
ونحسها الدنيا صغيرة
وكل ليل معاك منسي
وكل مجلس هو الحصيرة .