وطني

ايقصّر كل كلام نقوله..

وتعجز عالتوصيف حروفي.

فيه صرخت الصرخة الاولى..

ومن هالوطن مليت اكتوفي..

كل اشبر منّه كل مَوطا ..

كل ذرَّة في سهل ووادي .

وين ما خطَّت فيه اقدامي ..

هـ الوطن مكان لميلادي .

وطْني أمّي .. وبوي ..وزادي

وطْني انفاسي .. وقوت اولادي .

في موجَه و زخَّات أمطاره ..

في اغناه وفي كلّ اشعاره ..

نسمع فيه الوطْن ايقول :

أنتوا هم عنواني ..

نسمع فيه الوطن ايقول :

يا اطفالي .. وحبَّاني ..

من روحي خوذوا الاحساس ..

من نبضي خـوذوا الانفاس ..

خوذوا تـمري وكلّ شرابي .

خـوذوا نخـلاتي وزيتوني ..

خوذوا عمري و حتى ترابي ..

بسّ اللِّي في القلب عطوني ..

لمَّا م القلب اتحبُّوني ..

تـلقـوني بـيـكم ولاَّف ..

ولمَّا اتحبُّوني تلقوني ..

كيف ما كنت مع الاسلاف ..

حـنون انفيض دفا ومودَّة ..

وعون لهم في وقت الشّدَّة ..

كيف ما وفَّوا ..  كنت الوافى. .

باثماري واللي في جوفي.

عشق الوطن

أنا من عشقي لك نحني

جبيني وخافقي والجاه

ياوطني بخير صبّحني

واستودع عليّ الله

وهيا بشمسك وظلك

أصبح فيّ

هيا بنورك وطلك

خذ بيدي

وازرعلي أمل يومك

وداعبني بشذا نسومك

ياوطنى الاغلى

ياوطني

ياوطني اليوم ياني اكبرت

وعرفت أيش قاللّي سيدى

في أول يوم فيه ابحرت

وكانت يدّا في يدّي

وكان يقولّلي الموجه

عليك اتصبح اتربح

ولك تدعي

وهذا السهل وامروجه

وحتى الورد لك فتّح

وهو يدعي

ياوطني اليوم ياني اكبرت

وعرفت ايش قاللي سيدي

في اول يوم فيه ابحرت

وكانت يدّا في يدّي

وكان يقوللي هالوطن

ياخذ من خضاره روح

ولك يعطي

وكان يقوللي هالوطن

يا وليدي صبوح ربوح

مايبطي

علي من حبه ابنيه

علي من ضحّى لجله شوي

حبيبي..وطني يسلملك

من يدعيلك بقلبه

حبيبي..وطني يسلملك

من يصدقلك بحبه

ومن في غرسك ايسقي

ومن في شوكك اينقي

ومن في هامتك يبني

وانا من عشقي لك نحني

نسامحك كي تجيني

نسامحك كي تجيني ..

وما نحوّجك للعذر ..

هو طبع طول سنيني ..

وما يكف مزني ع المطر ..

لك حق تخشى صدي ..

قبل بسموح تطالب ..

نرد الكفا لو بودّي ..

لكن الطبع الغالب ..

اللي فيّ وين اتجيني ..

نسامحك كي تجيني .

وما نحوجك للعذر

عشرة عمر يا صاحبي

لنا ومترافقين

قوللي كذا يا صاحبي

صارت زعمها وين

انك عليّ اتعد

و مالقيتني المصالح

واللا بسطت اليد

ونا اللي رفضت نسامح

اللي فيّ وين تجيني

نسامحك كي تجيني

وما نحوّجك للعذر

صحيح الزعل راويني

والحزن مالي قلبي

وباين غضب في عيني

ما بالسموح ينبي

وحتى كان هالمرة

يا صاحب خطاك كبير

لو تعاود معاي الكرة

مازال فيّ الخير

ومازلت وين تجيني

نسامحك كي تجيني

وما نحوّجك للعذر .

هو طبع طول سنيني..

وما يكف مزني ع المطر.

كفتين

كفة فيها كل الدنيا

وكفة فيها بس انتي

كفة فيها انطلاقي للمحبة

كفة فيها اشتياقي للاحبة

وكفة فيها بس انتي

كفة فيها كل احلامي وظنوني

كفة فيها ارتباطي  هالجنوني

وكفة فيها بس انتي

وكل ما في الكفة الاولى

 من مشاعر

هيّا نحو الكفة  الآخرى ..

وفيها انتي

حتى لو ارضيتي عذابي

حتى لو يمي ظلمتي

ينتفض قلبي أسا

ويرفع كفوفا دعا

مايصيبك سو   ياانتي

يللي أدمنتي دموعي

وازدريتيها صلاتي                              

يللي لملمتي ضلوعي

وازدهرتي من رفاتي

من يراهن

ان اشواقي اتناقص

مهما درتي يبات خاسر

كل ماتجمع كفوفي

من احاسيس وعواطف

من مشاعر

 فيك  انتى

ولجلك انتي

هي مشاعر.