السبت، 4 أبريل 2015

إلى رفيقة دربي



لو تخلّا الناس عنك

لو تخلّا كل حد

لو تنكرلك أحبابك

لو خسرتي كل ود

في حنايا طي قلبي

في عيوني لك مكان

في شراييني ونبضي

عشك انتي والأمان

يارفيقة درب دربي

يااخطاه اللي بدت

من يوم خطّا

نين مد اشتد عوده

ياودودة

كل ما قدّمت خطوة

نحمد الله

ونشكر الحظ السعيد

ومرة صدفة

وساعة جابتني لطريقك

نا رفيقك

ولو تخلّا الناس عنك

مش لأني بس عشقتك

ولا لأن القلب جذوة

في هواك عمره نزف

ولا لأني في محاريبك قضيت

العمر كله معتكف

بس لأني بالاضافة

لما مضى

صرت فيك..وصرت منك

وصرتي لي كل الحياه


ولو تخلّا الناس عنك.

الأربعاء، 1 أبريل 2015

بلاغة صمت


ذاب صمت وما ايتكلم

لو يذوب العمر كله

م الخجل عينه اتحشم

تلتفت حتى لظله

ونا مهابة صمت روحه

خوّفتني.. 

لو جرحت وما تغنّى

نوصل اللحظة انتمنى

من حبيبي بس طلّه

ومن هواي اللي سكنّي

اعترفت الصمت كيفا

صرت نفهم بالإشاره

ونعرف بصمت المعاني

نعرف امتى صمت سارح

وامتى هو صمت الحزين

وامتى صمته صمت فارح

وامتى ماليه الحنين

وامتى في صمته اعتذار

وامتى في صمته تمني

وامتى هو عنده أسرار

وامتى هو زعلان مني

ومن بلاغة

صمت روحه وبوح ظلّه

اعترفت الصمت واكثر

يعجز الحرف بأمانه

يوصف الاحساس كلّه

بس عندي الصمت يقدر

باعذب احساس ايتجلّا